"" गोथां अ'न्नाइ""
------------------------
आं मिथिगौ जेबो मोन्थाइ गैलिया
नोंनि मेगन मोदैयाव , थेवबो
मोनसे सम थिबाव नों
जुदिबो आखायाव सम मोनोबा
बै समावबो नोंखौनो हास्थायगोन
जेरै आं दिनै...
मानोना आं बायफ्लेथारनाय नोंनि थाखाय,
नुयोमोन अ'न्नाइ मोजांमोन्नाइ
गोसो, मेगन आरो आखायनि फावथिनायाव
नों गिखांबायोमोन, गाबखुमा बायोमोन
माब्लाबा मोजांमोन्नाइनि रादाया
गेमब्रुलांबा मिथिस्लाबै अब'थिरायै!
नाथाय दिनै थांनाय समाव
मानोबा फोरमायलांदिया
गावनि सानथिफोरखौ,
नों मिथिनो लुबैयोना आंखौ?
आं थांनानै दं जानो हागौ
नाथाय जेबो फोथांहादिया
नों एंगार लांसेयावबो
सिबिनो आरो अ'न्नो बावदिया
हास्थायो दाबो नोंखौ
सुदेम बार जाना फागुन बिलिरफैनाय
अखोरांनि जोमै जाना
बोथोरनि खुदुमफैनाय!
---------XXXXXX----------
AJIT BASUMATARY,Chennai.
गोसोथोनायनि गांसे लायजाम!
===================
बेखेवहायै सानस्रि आरो मिजिंनि गुमुरजों
गावनाय बिखानि हास्थायनाय आरो
गोमानाय आंगो गुस्थिनि मिनिनाय,
सिरिफैयो जोमैनि अखा दाबो
बायग्लिनाइ गोरबोजों नों बेंआ गोरोबा
जेब्लाबो आंखौ मोन्नो थांखिजों
फोरमायै लिरहदों नों लाइजामाव
जेराव आं गावखौ ग'थाइनो हाथारा।
गोया आखायाव गोहो दाबो फिन्नाइनि
रुजुनायाव आं थारैनो नोरजियाथार
गोसो दंमोनब्लाबो लिरफिन्नो
आखायनि ग'हेनाजों हाया
गावनि गोग्लैसोनाय थासारियाव|
आंहा दाबो थादोम बिथा गैजाया
जेराव आं थायो बेयावबो
उसुमाय उरावनि रंजानायजों स'मायनाइ
बोथोरनि बार-अ'खा आरो सान्दुंआव
आं गावनो रैखाथि गैथारा।
बेखायनो - - आं
दोनखोमायो हास्थायनानै गाबनाय बुब्लि
मोजांमोन्नाइ गोसोनि सानस्रि
नोंनि सिग्लाबनाय लाइजामनि आन्दोआव।
======XXX=======
AJIT BASUMATARY, Chennai, TN
"दासिमबो आनज्रायनाय "(आर'नाय 10-09-2017)
बिदिन्थाया नेथ'थाराखैमोन
जेबो भावथिना होना सुबुंनो
रोखा फैफिनहायैनि बेखेवथिजों,
आखायाव गंसे आबुं सोहोरनि थांखि
गोजौ मुगाजों सिनायजायैयाव
बेमा खांकमानि उदां गिदिंनाय नुथाय,
दिनै आं आनज्रायनाय आंगोनि
थांना थानायनि नुथायखौ
ओंथिगोनां सावगारियै महर गाहोनो,
मिजिंनि गंसे आबुं देराय़ाव
हायाखै थांलाय फैलायनि लामा दोंसे
खान्थिजों आखाय हमनाय उनावबो,
बेनिखायनो
हमथादों गिदिंफिननायनि आगान
गोबानांदों दुखु दाहानि भावथिना
थिनाय मिजिंखौ मोन्नो ।।
Ajit basumatary /Chenn
* * * * * *
"आं थैनो लुबैया "(आर'नाय 10-09-2017)
समा थाथ'वाखैमोन आंनि आखायाव
मोन्नायावबो फेलेंनिल' नुथि,
होंगो दोंगो सुबुंनि गंसे सोहोराव
गोसो आरो रोंगौथिजों
नाजाब्लाबो बिदिन्थानि आगानाव
खाबु गोरोबा गोरोबा,
दिनै आं नाजाथाबदों
बिदिन्थानि जांख्लाजों दावगालांनो
सायखंआव गावनि महर नुनायनि
सुबुंआबो मिथिनायनि जिउनि जेबो नागिरनाय
आंनि जेन्नाय देरहानायजों दान्दिसे गेलनाय,
ओंथि फोरमाय़नो फिसा न'सायाव
खांख'मा - एनजर जिरायनायनि ,
बेनिखायनो
बिबारबारि, आगरजों समायहोदों
सोरगिदिं न'जों, लांगोना
आं थांना थानो गोसोजों
थांना थानायनि नुथायखौ
समायना खालामनो
आं गावनि थाखाय ।।
* * * * * *
"द'र्जा"(आर'नाय 10-09-2017)
हाजासे दोनखोमानो नाजादोंमोन
खारग'हानायनि भावथिनाजों
बियो ग'ले - ग'ले
गेवनांनायनिफ्राय जेबो बुब्लियाव ।
ज'रासे मेग'नाव
दाहा गेलेनायनि खोथा बुंना
एंगारनो नाजादोंमोन सैथोखौ हमफिन्नो
नाथाय उदांश्री हास्थायनायखौ होबथानाय
जाउनाव बियो गेवफ्लेनांदोंमोन हुखुमाव ।
नुनानैबो नायनो हाया
आं बिखौ उदां खालामनो
बिबो गावखौ दोनखोमादों
मानोना खेंफोर हाथारा सैथोखौ,
गैय़ामोन अ'न्नाय निमाहा मोखां
रानिआवबो गोरोबथानि महर सोरजिनो
जाउनाव दिनैसिम गंसे द'र्जा बादि
खेवजादों गोसोबादियै बयजोंबो ।
* Ajit Basumatary
*CTS, CKC, CHENNAI
* * * * * *
"मोनसे नुथाइ - लुबैसुलानि "(आर'नाय 10-09-2017)
साखाथियावनो नायगार - नायगारै
गोसो बादियै फान्दायनानै सिख्रेबदों
गावसिनि बेरेखा फोरमायना
रंजानाय मोनसे नुथाइजों,
साखाथियावनो आं
बन्थ' मुरा बादिल' ग'संदों
जेबो राहा गोयैआव,
बियो रैखा मोन्नो आंनि फारसे
मोदैनि सिग्लाबनाय मोखांजों
आखाइ फोलाव हरदोंमोन म'दतनि,
आं बिखौ गोबानो हायाखैमोन
बिनि रोजा मुखाजों
खाथेजानाय राहागोथे जिउ
गैयैआव समानथिनि हाथियार
फोरमायनांगौ जादों
राहागोयै मोदैजों,
आगान फ्रोमबो सुजुनाय मिजिं
गोसो गोयालासेनो सिफायनांबाय
लुबैसुलानि भावथिनायाव
एंगारनांबाय सुबुंनि अ'रन।।
=======
Ajit basumatary CTS,
CKC, CHENNAI
* * * * * *
दिनैबो लिरनाय जायासै गांसे लायजाम (आर'नाय 10-09-2017)
लिरनो सानब्लाबो लिरनाय जायासै
खौरां लानायनि लेखायै हामलायथिनि
गांसे लायजाम मोजां मोननायनि बेखेवथिजों
देग्लायनि रंजालि बैसागुआवबो,
गोबां खेब बैसागु बारलांबाय
नोंबो खौरां हरलिया, लानोबो हालिया
दाखालि बावैनि बेसेबांबा रंजानाय बुब्लिखौ
नोजोर होयोब्ला मोन्दांथियाव
नों दिनैबो अनसुलि गोरबोआव थिनाय
गांसे आरनाइजों बरायनो, अ'न्नो
दासिमबो हांखुरनि सावगारि बेरखाङो,
हाथाराखै नोंनि मिनिनाय, खुदुमनायखौ
दोनखोमानो गोरबोनि बोखांहायै ख'नायाव
रंजादों मोसादों दिनैनि बैसागुआवबो
नों नुहुरस'मोनै सिनायमोनै गोजान आन्दोआव
सेन्नाइ, बेनिनो उदां बिखायाव बयबो
फोरमायदों बरनि हारिमु, आसार-खान्थि
जौ जौ सुबुंनि गुथालजों
जेराव आं मोसादों रंजादोंब्लाबो
नुफा माफा नोंनि महरनि बेरखांथियाव बायग्लिनायमोन,
नोंनिनो गोसोखांथियाव फोरमायहायासै
रंजानाइनि गुबै दोहौजों फोथायथि बयनोबो,
जुरिजेन्नायनिल' महरै दाखालिनि गोरोबथा बुब्लि आरो
दिनैनि दाहाजों लिरदेरनायबो जायासै
गांसे लायजामाव नोंनो फोरमायहरनो
नोंनि थं मोनैनि जाहोनाव ॥
*Ajit basumatary
Phone: 7358169118
CTS, CKC, CHENNAI
* * * * * *
"फागुननि जाहोन" (आर'नाय 26-03-2017)
दासान्दि आं स्केटसखौ गोबाना
आरांगायावनो दंबाय दं
नोंनो फोरमायनो खन्थाय़ महरनि लारिजों,
जेराव आं लिरनांदों
दोनखोमाहायै गोर्बोनि
नोंखौ मोन्नो हास्थायनाय सिमां
आरोबाव बुरखायहायै गाबनायनि जाहोन।
मोयासिम नेबाय दंमोन आं
दाखालि आंनि सेराव मिनिनायनि
ओंथि नागिरै गोजोमना
दिनै सिग्रोम - दांग्रोम नागिरसेयावबो
मोन्नो हायाखै गोसोनि गोसोम जायख्लं
अब्लाबो दाबाय मोनसे बिथा गोरबोआव
बयबो गेलेनो हानायनि ख'न्थायनि दिथौआव ।
नेथ'वाखैमोन नों आंखौ फागुननि उनाव फागुन
फारनैआखाइ हमना दावगालांनायनि थांखियाव
माब्लाबानो एंगारलांदोंमोन थिनाय गोरबो,
मोनगोन थांखिजों नागिरदों आं दाबो
आसिननि निहोर, बिबारबारि, बालाबारि
मिथिनो लेखायै थाबोनाय "फागुननि जाहोन"।
========अजित बसुमतारी ========
========सेन्नाई / टी. एन=========
* * * * * *
"मोन्थाइनि बिबायारि" (आर'नाय 26-03-2017)
बोहैलांदों मेगनजों मोदै
गोमानायाव गावनि आंगो
गावनि मोन्थाइ
गावनि नखरावनो गुबुननि उदखारियाव।
फैलाव गोजोननि फोथाराव
गेलेनाय सोद्रोमथिनि थांखि आरो जिव राहा
बुथारलांबाय हथसुरिया बारहुंखानि गुथाला।
आखायनि गोहो नागिरना
गोलाव मिजिंनि दिंङा जावनाय सोलेरा
मेंरुलांबाय बुब्लिनि फाख"नजों
देरहानांगौनि लामायाव।
अम्बासि हरनि बोथोराव
हावरिया जलंगा लाना
रैखाथिनि साखाथियाव
दा जों मोन्थाइनि बिबायारि जानांबाय ।।
*अजित बसुमथारि
* माइनावफख्रि
* * * * * *
"जिवनि आद्रा खन्थाइ"
नोंखौ सिमांआव दोन्नानै
दावगानाइनि मिजिंआव
अन्नाइ गोसोनि आब्रा आखुवा
दिनैनि बुब्लियाव
नों मानो गावनि आंगो अंगखौ
दोनखोमानो नाजाबायो...?
रोजासेमानि मिजिंफोरनि गेजेराव
फारनै गोरबोनि गोरोबथा खुन्थियाव
खाजानाय गोरा फाखोनि रादाइखौ
नों गावनि आखाइजोंनो
जोथोन लानायनि थांखियाव
मानो सोमजिहोखो
जोंब्लावनाय अरनि गुथाल...?
जिवनि मेथाइ
गोरोबथानि आगानजों
देंखो होनायनि थांखियाव
गोसोम सानस्रिनि मोखां
नों मानो फोद्लाना होखो....?
नोंनि -- आंनि
जिवनि गुवार दुब्लि
दानसोरां नागिरनायनि लामायाव
उदखारि महरनि सावगारिफोरा
मानो बोजाफैयो दा गले गले...?
जुदि, नों दासिम्बो बेखेवोब्ला फुं-मोना
गोरबोयाव आसि सोमब्र"ना लिरनाय
"जिवनि आद्रा खन्थाइ"खौ।
*अजित बसुमथारि
*माइनावफख्रि
* * * * * *
"मिजिंनि आलासि"
आखाया साननि रुबैखौ बोखारबायदों
मेगननि नोजोराबो समजों लावलांदों
गोरबोया नों सफैनायनि बुब्लिखौ
बरायनो हांखुर जुगामि आर"नाइजों,
मिथिंगाया दिनै रोदोमा - रोदोमा
खौवौनि ख"बामाबो गोरोबा - गोरोबा
नों जुरिजेन्नाइ मेथायाबो
आंगो बुब्लि मोना मोना,
नुनो मोनलिया रंजालि बैसागुयाव
जुगामि बर" गामिनि आंगो हारिमु,
गैलिया नसुंआरि अनलायनाइ
गावनि देरहानायनि जिग्रोद आखुआवनो,
एरगोबां एरबाय खांकमा निंगिनि
उदांङै हमख्रब हमसि उदै सुथाबनाय
दाहा दाखाजोमै साग्लोबहोबाय मिजिंआव।
लामा नायै--
दिनैबो सफैयासै जोंनि आंगो गामियाव
लेंहरनाय लेखायै "मिजिंनि आलासि"
दिनैनि रंजाथियाव।
*अजित बसुमथारि
*माइनावफख्रि
* * * * * *
"ग'ब्लं"
आं गाबनो गोनां जादोंमोन
सासे गोरलै गथ" बादि
नागिर-नागिर मोनैयाव गोजोन,
गोसो बादियै बेफ्रुनो हो
आंनि जेंनाखौ- अरगें बायदि,
आंनि थांखियाव
आं जिरायनांदोंमोन
बिनि हथियार जों,
जानो हो बिखौ
नंखाइ मोखांनि सुबुं
बयखौबो दबथाइनो,
बिनिसिम आं--
लाजिनाय मोखां दिन्थिदोंमोन
मानोना -----
आं नंआमोन साहस गोरा गासैजोंबो।।।।
Ajit Basumatary
Chennai,Tn
* * * * * *
"आगान"
(अनजालिनिसिम गोसोखांनानै)
नोंनि मेथाइनि देंखोया
मेगनाव दाहानि मोदै होफैनाइ नुयो,
ख"न्थाइनि आगानाव
नुयो आंगो नेवसिलांनाय,
सानस्रियाव खोनायो
दावगाबावनांगौनि सिमांजों
आथुर आरो नांथाबनाय।
बुब्लिनि खारथायाव मोनहासवाखै
आखाइनि गोदान रेबगना
दावहानि बोनानांगौ सावगारियाव
महर हाया हाया।
नाह"र बायदोंमोन आज्लं- आज्लं
सुबुंनि जालमाखौ बोखारना
नों दावगालांनाय जोबथा रुबै फारसे
जेराव आंनि सुखु आरो मिनिनाया गोमाहैदोंमोन।
दाहानि अनगायै जेबोआनो थालांदिया
नोंनि अन्नायनि नेरसोन महरै
ख"न्थाइ आरो मेथाइनि आगानाव।
^ अजित बसुमथारि
सेन्नाइ, तामिल नाडू
* * * * * * *
"अ"खाफोर"
गोबावमानि आंजोंनो दंमोन
दा बायगर अमाबैसाया
अहाया - अहाया लुफावना होबाय
दाहा आरो खोमसि,
दा बयबो जंखायो आंखौ
बायगर खोमसि फैसालियाव -
थिफुद्ला सांग्रेमानि मुलुग गंसे फोसावनाय
एनजर इंगीनि, खांकमानि खावखुमानाय
उदखारि बेमानि खैसार जे सानाय,
दा आंखौ बयबो नेवसिनो हमबाय -
फुंबिलिनि जारां अखोरांआवबो
दुथां जोमैनि आवग्रिनाय आखाय,
आरोबाव बारा बारासिन एंगारलांबाय
मोनाबिलिनि सुदेम,बाराबो,
दा आं हासथायो
नों फैफिन्नायखौ
बेखायनो खेंना दोनो
लांगोनानि दर्जा।।।।।।।।
अजित बसुमथारि
सेन्नाइ, तामिल नाडू, 600119
* * * * * * * * *
"सोरांनि लामायाव"
थैलांनाय ह"रनि फाइखिफोरा
बिष गोनां उखुमब्रिनि सोरांजों
बुंफ"बनायब्लाबो बरफोरनि न"खरा
दा आलारिनि जोंनाय सोरांआवनो
गोजान लामा हान्थिनायनि मिजिं
सुजुनो हाबाय ;
नुयोसै नखर गामियाव बयनिबो
ग्रोम -ग्रोम आबादनि जावरिखांनाय,
सोलोंथायनि गोदान फाख"न
राव हारिमु फेहेरनायनि गोदानै
आबुं जांख्रिथाय,
सिनायथि आरो थामोनथाखौ
बरायना बयबो होख्रावदोंसै गारांसेयै
मोन्नांगौनि थांखियाव,
बिदिन्थानि सायख्लुमाव बुहुमनां
खौसेथिनि गोरोबथा हेण्डसेक,
मेंनाय गैयै, जिरायनाय गैयै गोसारनाय
रेबगननि र"नसायनाइ बिदां,
नागारनानै जायजों जों गावनि मोन्थायखौ
मह"र होनो हाया।।।।
अजित बसुमथारि
सेन्नाई, तामिल नादू, 600119 |
"दाहा"
रानलांनाय फोथारबादि, बिनिनो दाहाजों
आं नानिरबायो गुवार बुहुमखौ गाग्लेमना
नोंनि गोमालांनाय अ'न्नायखौ मोनफिन्नो,
नेनानै दं आं-
बालाहामानि गोरबोआव
गांहाबनाय फानफेबालि बादि
नों जाख्रिसे अ' खा जाना फैगौबा
फागुननि बारजों नों अ'न्नाइ होफैगौबा,
सुदेम बिलिफां दाबो नागिरो आं
रोजाबनो गोरोबथानि दोंसे आबुं मेथाइ,
नों आंनि गोरबोआव दांग्रोमब्ला मोनगोन
नोंनि थाखाय सुजुनाय खन्थाइ मेथाइ
आरोबाव सिग्लाबनाय लाइजाम
जेराव दाहानिल' बेखेवथिजों दानाय।
जिंगा आरो दाहाजों आं गब'नाय दाबो
थांना थानांगौनि मिजिंखौ लाना
बेखायनो नों फैब्ला
जिव थांनाइ गोनगौमोन
थांखिया उदां बिरगौमोन
थफ्लासे ख'न्थाइ मेथाइफोरा
बयनिबो आखायाव आंगो जागौमोन
आबुं म'हर होयोमोनब्ला ख'न्थाय-मेथाइ !
AJIT BASUMATARY, Chennai
---------XXXXXX----------
* * * * * *
"अ'न्नायनि बुब्लि आरो राहागोयै "(आर'नाय 10-09-2017)
आंनि गोसो, मेगन आरो आखाय
गोबावमानि जाबायमोन बावगारलांनाया,
ह'रखाबै दिनै मानोबा फैदों आरो थांदों
अनफावरि गोसो लामाजों ग'ले ग'ले
मेगन सिगांआव फागुन म'हरै बिलिरफैदों
ख'न्थायनि सारियाव मोनफिन्नो
हास्थायनाय सोदोबनि दाहारजों
मेथायाव बावनो हायै देंखोजों।
रिथि रिथा हाथ'रखिनि न'खोरांआव
नुदों नोंखौ बायफ्लेनाय अ'लंबारै नागिरनाय
दिनै गाबोनि फारागाव गुबुन गुबुन जायगायाव
बेखेवफैदोंमोन गोर्बोनि बाथ्रा
रुजुहायै मोदोमनायजों खातिकनि आखायाव
अनजालि सेवालिनि बिखाजों ।
दुब्रियाव गेलेफैनाय समनि आगान
अ'न्नाइ बिलिरनायनि आखु
बावनो हाथाराखै जानांगौ
आंनि माही गोरबोआबो
जाउनाव आं ज'थिरनो हाथाराखैमोन
थासारियाव माखासेमानि मिजिंजों।
गाबदों आं दाहा बुब्लिनि गोसोखांथियाव
आरो नों होफैनाय गोर्बोनि सानश्रीयाव,
नाथाइ आंहाजे गैलिया मोनबो राहा
नोंनि आखाय ह'मथाफिन्नो
ग'ले - ग'ले फोरमायब्लाबो
जिहाद गोरबोजों हास्थायनायनि जेबो खौरां ।।
* * * * * *
"आंगो बिसिनो "
============
नों आसा खालामनाय बादियै
आं थिरां खालामनो हायासै
नाहर गुदियाव जिरायना लामा नायदोंब्लाबो
थिनाय आर'नाय गामसाजों समायहोनो
रंजालि बैसागुआव आंखौ,
आं मिथिगौ नों गोबां गेग्रेबनाय
सानैनि जानथायजों आरो गोबां खेब
रंजालि बैसागु नुजा हायैयाव,
हास्थायनाय आय-आफा,आदै आमायजों
नख'रनि अनलायनायखौ बेखेवनो,
गोरोबथानि सानस्रिखौ गोजोर लाखिनो
फोरमायनो बयनोबो थुलुंगानायनि बिदिन्थियै
नाथाय नों हास्थायनाय बादियै
जेबो बेरखांथिनि महर गाहोनो
नुजाथि हैनो हानाय जायासै,
थेवबो नों रंजादो मोसादो आय- आफाजों
बोर बिदो गसायनाव गोग्गो देहा बयनिबो
गोरोबथानि बुब्लि बयजोंबो मोनसे नोजोर
अराय हेंथा गोयै समाजजों थांना थानो,
आरोबाव बि नों निमाहा
मैनालि,सेवालि नोंनिनो बिलोगैनाव
माखासेमानि जिवनि जेंनाखौ
बोखारनो हायैनि जाउनावनो,जे
बिसोरनि नोजोराव फोथायखेबस' जानांनाय
गुबै जाहोननि बेखेवथिजों।।
* * * * * *
"जोंनि गोदान हालामाव दाफैथ' नों "(आर'नाय 10-09-2017)
दाफैथ' नों
गोदान हादाननि खोमसिआव
बेयाव बयनिबो मेगन आखाइ रान्नाय (गोरान),
हर गेजेरनि समाव
गाज्रियै सियाल सैमानि गाबनाय दं
जायखौ नों सहायनो हानाय नंङा,
आरोबाव नों सहायनो हानाय नंङा
सुबुंनि हाग्रा गुदु सिङाव
जीउ खुंनानै थांना थानाय़खौ ।
दाफैथ' नों
मानोना बेयाव दरसि मायाबिखौ
खोमानो हानायनि राहा
दाबो लाथ'नो हायाखै आखायाव,
आरोबाव गोया बेयाव सुदेम बारनि फुंखा
गावजों गावनि सायाव खोमसि फोथायनाय
जोबाखै बिदा फंबायनि बुथारलायनाय
आरो मोले जोंनायजों दुगानाय दाबो दं,
बेनिखायनो दाफैथ'थार
जोंनि हिंसायारीजों नांथाबनाय हालामाव
मानोना जों आबुं सोहोरनि आरो
बयनिबो गोजों मोखांनि थाखाय नाजाथाबनाय।
=======
Ajit basumatary CTS,
CKC, CHENNAI
* * * * * *
"आं अ'न्थाइ बिखा जाबाय " (आर'नाय 10-09-2017)
जिउनि दाहागोनां फायखिफोरा
गोबावनि उनाव दिनै
सागोरनि अ'न्थायबिखा अ'न्थाइ बायदि
म'हर गानो हाबाय ।
दा बियो बोथोरनि सुदेम ख'बामजों
मोखथां बिस'म्बिखौ फांथे फांथे
फिन मोजां मोननायनि खौरां
फोरमायनो नाजाब्लाबो आरो
नायफिनैयाव ह'ब्रा ह'ब्रा गाबब्लाबो
आं नोंखौ आंगो खालामफिन्नो
हाथारनाय़ नंलिया।
बेखायनो नों दाफैसै साखाथियाव
आंखौ एमब्रायै बरायनो जेबो भावथिनाजों
मानोना आं थांनांगौ लामाया गोलाव लावबाय
मावनांगौ आखायाबो बिदिन्थाखौ
नेवसिहायै जाथारबाय ।।
* * * * * *
"एंगारहायै मोनदांथि" (आर'नाय 26-03-2017)
आखायनि रेबगनाव नुजाफैयो -
गावखौ दोनखोमाना एबा
नोंनि नोजोरनि हाब्रांआव थाखोमाना
मेंरु आबादारिनि आखायजों दैज्लां
फोथाराव गेलेनायनि आबाद आबाद
समायना आसिन बिखा मिजिंजों ।
गोजा, गोथां, गोमो बायदि गाबआव
आसि दिन्थिनानै एरखनो हायाखै
आंगो आंगो गोबानाय आरो अन्नाय
गोरबो इसिंनिफ्राइ
जेराव आं दाबो गोसो मोनसे सोरजिनो हायाखै
सायख्लुमखौबो नायनो बानायनि
नों एंगारलांनाय समनिफ्राइ ।
समाव मिनिस्लु अखाफोरनि महराव
माब्लाबा समायना ग'लाबाव
सिखिरिनि महराव नुयो
गोयैआवबो उदां फागुन आखायाव
बिलिरनो नोंनि खानाइ बिलाय।
आबेगाव स'नाथि गाबनि मुसुखा
मेगनाव बोहैनाय मोदैनि रेगा
नुनो मोनो रुजुख'हायै अन्नाय
मोनदांथियाव जिउनि मोनाबिलिआव।।
===+===
:Ajit Basumatary
:Chennai, CTS, CKC
* * * * * *
"गंसे गोथां देरा" (आर'नाय 26-03-2017)
समनि गोबार बारहुंखायाव
आं थावरिनो हायाखै
गोबाव सम थांना थानायनि
थ"फ्लासे मिजिंजों।
ग"ले ग"ले आखाय सिफाइदों
फेदेरनाइनि थांखिजों,
समाव गिखांदों--
मानोना आंहा गैयामोन गंसे न"
जोथोनै दोन्नाइनि अरगें बायदि मिजिंफोरखौ।
हायाखै सहायनो
गोरबोयाव गावनाय सार"न्थाइ
आरो बिनिनो दाहा मोदै,
मानोना आं
गोरोबहोनो हायाखैमोन मेथाइनि देंखो
आरो ख"न्थानि सारिखौ
थांना थानायनि गोथों लामाजों
बेखायनो आं मुखुब
"गंसे गोथां देरा"नि
जेराव आं रोदोमदोमै जिरायगोन।
*अजित बसुमथारि
* सिजौसा,
* * * * * *
"नोंखौ आं फोथायनो हाया"
आन्दायनाइनि खाबुयावनो नों गोमालांदोंमोनब्लाबो
दं नों दाबो आंनि बिखायावनो,
जेरै अन्दोंमोन बिदिनो अनबाय दं
दा बेयो रेदें- रेदेंसिनसो महर होजादों आंनि गोरबोजों।
नोंनि अन्थोब हरनाय फालि अन्नायनि बुब्लिखौ गोरोबहोना नायोब्ला
फोथायनो हाया नोंनि अनसुलि बिखनायाव जे
नों फोथाइखेबस" गोरबो सोरजिगोन।
आं फोथायनो हाया --
जहाबनाय अखाफोरनि सोरांआव नों आंखौ
गोथैबारिनि गिख्रंथाव फोथाराव थारै आंखौ एंगार बोमारदों आरो
अनलायनाइनि बागानसालियाव
मेगन गोसा बारहुंखानि सिमब्रेनाइ फैगोन।।
*अजित बसुमथारि
*माइनावफख्रि
* * * * * *
"सिमांआव नों थैदों"
गाबै गाबै
बुहुमनि महरा सोलाय लांदोंमोन,
बियो अरायनि एम सायाव
स्रोद उन्दु लांदोंमोन बयखौबो नागारना,
उनाव सुबुंनि फालो गसंनाय
बयबो सिनायजायै आंनि नोजोराव
बयबो मोदोम गंसे गुफुर सि
नारा नाथा फोजादों उन्दुलांनाय सुबुंखौ
बायदि मोया भावथिना आरो
सुखुनि बराय मेथाइ रोजाबना
बयबो आवगायदों लासै लासै सुबुंनि फालोआ।
बिसोरनि फास्रा,आथिं आरो
सिगांफारसे आवथेबायदोंमोन
गोबां गाबदोंमोन हायाव उफ्ले उफ्ले
मोनफिन्नाइनि आरो नागारलांनायनि,
नाथाय बिसोरनि बिखाया अन्थाइ बादि गोरा आरो
जानांगौ बेजोंनो दाजानाइमोन,
जाउनाव बिसोर सोरनिबा गाबनायाव-गावफानाय
सोरनिबा बिखनायाव गथायनाफिन्नाइ
सोरनिबा खैफोतआव मदद होनाय गैयामोन,
बिसोर गावनि लामाजों बिरलांदोंमोन।।
Ajit Basumatary,chennai
* * * * * *
"नों दायनिगिरि जानो हाया"
जावलिया फागुननि बाराव
नोंनि हायना गोजा गोथां गोमो
आबिरनि फोथाराव आंसो गेलेदोंमोन,
फिन्नांगौनि बिदिन्थायाव नों
अन्नाइ मेगन बाइनाय इसारा फोरमायना
गोरबोखौ बुफाइ लांदोंब्लाबो
गोरोन्थिया आंनि,
बिरनांगौनि ओंथिया
नोंनि अखोरांनिखुरै गुवारसिनब्लाबो
दा बेयाव जेबो मिजिंनि फाइखि बिरलिया
गोसोम जोमैनि अनगा,
नोंनि थाखाय अबथिरायै
आंगो बासायाव आं उन्दुलांङोब्लाबो
बयनिबो गोसो मेगन राव
दाखालामथों दायनिगिरि नोंखौ
"दायनिगिरिया आंसो"।
* * * * * * * *
" माब्लाबा....... "
आं माब्लाबा..
ख"न्थाइनि फारियाव
गोबावमानि आसि सोमब्र"ना नागिरबायो
जिवनि गोजाम सानथिफोरा
बोहैख" हायै मोदैजों
खेसेरनि फोथाराव
दासिमबो थांना दं सान्ना।
आरोबाव माब्लाबा..
दानखोमसि फैसालियाव
दर्जा,खिरखि नागिरबायो
सोरगोफुरियाव थांनायनि
गोरा गाहाइनि साखाथियाव
गंग्लायै बिख"नो
सम जायैयाव एंगारनायनि खालार
मानोना आं बे जिवाव
लाथिखनि उदां फोथारावल"
दागानो हादों ।।
* * * * * * * *
"उदांङै बिरनो हो"
गोरोबथानि सावगारि बेरखांनायनि सिगां
बयनिबो दिथौआव बेले- बेजे
सोंनायनि जांख्रिथाय;
बयबो देरहानो,आरजिनो गोजौ मानथाखो
लुबैनायनि थांखियावनो
फिसा-फिसौ कुरुक्षेत्र ;
मेंनाय गैयै गोजान लामा हान्थिबाय
उदांस्रिनि दावहा
नाथाय------
बयबो गोसो आरो मेगननि आन्दोयाव
गावनि से,नै,थाम
सानखान्थियावसो मुखुब नाजा,
बहा गारबोखो नोंनि मिजिं आरो दावहारु
मानो नों बिरहोनो गोसो गैया
एबा बिरगोनसो उदांङै।।
अजित बसुमथारि
सेन्नाई, तामिल नादू
* * * * * * |
